God of War: Ragnarok ka publikuar tashmë një datë lançimi për PS4 dhe PS5, e cila do të jetë në datën 9 nëntor. Zhvilluesi i PlayStation Studios, Santa Monica Studio konfirmoi këtë lajm ditën e mërkurë.
Sony publikoi gjithashtu një trailer të ri për këtë lojë, megjithatë nuk është një gameplay, por CGI, që flet për aventurat e reja të Kratos dhe Atreus. Sony dhe Santa Monica prezantuan gjithashtu disa edicione të ndryshme të God of War: Ragnarok, që nga ai standard (që do të kushtojë $59.99 në PS4 dhe $69.99 në PS5), “launch edition” që do të përfshijë armaturën Risen Snow dhe ndryshime të tjera kozmetike për Kratos dhe Atreus, dhe Jötnar Edition.
Ky version ultra-deluxe përfshin lojën, një grup zaresh nga Brok, një kopje të Mjölnir 40cm të gjatë dhe shumë gjëra të tjera. Më poshtë ju mund të shikoni një video unboxing të Jötnar Edition.
Ngjarjet në God of War: Ragnarok janë të zhvilluara 3 vite më vonë, dhe ne do të shohim Kratos dhe djalin e tij adoleshent Atreus të sfidojnë zotat si Thor, zotin e bubullimave, dhe Freya.
Pritet që kjo lojë të jetë mbyllja e sagës Norse të God of War, e cila nisi në vitin 2018 me aventurën e Kratos dhe Atreus.
