Starlink është një shërbim interneti që ofrohet nga SpaceX i cili përdor me mijëra satelitë të vegjël që ndodhen në orbitën e ulët të Tokës.
Deri më tani Starlink ishte aprovuar vetëm për përdorim në një vendndodhje të caktuar, si përshembull në shtëpi. Mirëpo gjatë kësaj jave, FCC ka autorizuar përdorimin e internetit super të shpejtë të Starlink në “Stacionet e lëvizshme në Tokë”, si përshembull makinat, anijet, kamionët apo dhe mjetet fluturuese.
Interneti satelitor nuk është një gjë e re, pasi HughesNet dhe Viasat e kanë ofruar një shërbim të tillë prej kohësh, por e veçanta e Starlink qëndron në faktin se kanë një numër shumë të madh satelitësh të vendosur vetëm 550km larg sipërfaqjes së Tokës. Në këtë mënyrë ofohet një përmirësim shumë i madh për sa i përket vonesës dhe shpejtësisë së internetit.
Tashmë që SpaceX ka marrë aprovimin për t’u përdorur në mjete që lëvizin, nuk do të jetë shumë larg momenti kur mjetet komerciale fluturuese dhe anijet të përdorin këtë sistem. Delta ka nisur testimin e internetit të Starlink në aeroplanët e saj që nga muaji prill, dhe SpaceX sapo firmosi një marrëveshje me linjën ajrore JSX për të pajisur 100 aeroplanë me internet më vonë gjatë këtij viti.
Autorizimi nga FCC vjen vetëm 2 javë pasi SpaceX lançoi dhe 53 satelitë të tjerë Starlink në orbitën e ulët në një nga raketat Falcon9 të kompanisë.
