Tashmë Meta do t’i japë fund testimeve për Novi, pjesa e vetëm e mbetur nga tentativat e kompanisë për t’u përfshirë në tregun e kriptomonedhave. Në website-n e Novi tregohet se portofoli dixhital do të ndalojë së funksionuari në 1 shtator 2022, dhe përdoruesve të saj iu është kërkuar të tërheqin fondet e tyre sa më shpejt të jetë e mundur.
Përdoruesit do të humbasin aksesin në llogaritë e tyre nga shtatori dhe nuk do të jenë në gjendje të shtojnë para në Novi nga data 21 korrik. Nëse dikush harron të tërheqë balancën e mbetur, Meta do të tentojë t’i transferojë këto fonde në llogarinë bankare ose kartën e debitit të shtuar në shërbim.
Meta prezantoi versionin e parë “pilot” për përdoruesit në SHBA dhe Guatemala gjatë tetorit të kaluar. Qëllimi i këtij portofoli dixhital ishte të mbështeste transaksionet e shpejta dhe falas duke përdorur kriptomonedhën e mbështetur nga Meta, Diem, mirëpo ndryshimet nga rregullatorët forcuan kompaninë të arrinin një bashkëpunim me Coinbase për përdorimin e Paxos stablecoin. Më vonë të gjithë tentativat e Meta nisën të dështonin në fund të 2021 dhe përgjatë 2022.
Muajin e kaluar Mark Zuckerberg tregoi se po planifikon krijimin e një tjetër karte dixhitale ku përdoruesit do të mund të menaxhojnë “veshjet dixhitale, art, video, muzikë, evente virtuale e shumë të tjera”. Me shumë mundësi ky portofol do të operojë dhe në metaverse.
