Deri më tani të gjithë smartphone-t që kanë tentuar të vijnë me sensorë të mëdhenj nuk kanë arritur të sigurojnë efektin e pritur nga këto pajisje. Megjithatë Xiaomi duket se do të provojë një gjë të tillë në flagship-in e ardhshëm 12S Ultra.
Sipas një postimi në Weibo që u vu re nga Android Authority, smartphone-i pritet të përfshijë një sensor 1 inç i cili është zhvilluar në bashkëpunim me Sony. Ky sensor është rreth 1.7 herë më i madh se sensori 1/1.33 inç i përdorur në kamerën kryesore të Samsung Galaxy S22 Ultra. Ky është gjithashtu në të njetën madhësi me sensorin që Sony përdori në kameran RX100 VII.
Është një zhvillim tepër madhor përdorimi i një sensori të tillë pasi ka shumë pak pajisje në treg që përdorin sensorët e mëdhenj. Madje dhe vetë Sony Xperia Pro-I përfshin një sensor të të njejtës madhësi por përdor vetëm një pjesë të tij. Sa më i madh të jetë sensori, aq më tepër pixels do të ketë dhe kualiteti i fotos do të përmirësohet shumë, sidomos në fotografitë në ambiente me pak dritë.
CEO i Xiaomi, Lei Jun tregoi se Sony dhe XIaomi kanë shpenzuar në total rreth $15 milionë për të zhvilluar këtë sensor të ri.
Xiaomi 12S Ultra do të prezantohet në datën 4 korrik.
