NASA lajmëroi ditën e djeshme se do të nisë studimin e saj të parë për fenomenet e panjohura ajrore (UAP) , të cilat njihen gjerësisht si UFO. Këto janë ndodhi që ndodhin në qiell dhe objekti nuk mund të identifikohet si një pajisje fluturuese apo një fenomen natyror.
Përgjatë 9 muajve të studimit, shkencëtarët do të shikojnë të gjitha të dhënat e grumbulluara rreth UAP dhe do të zbulojnë se cilat prej tyre ndodhin në mënyrë natyrale. Kuptimi më i mirë i këtij fenomeni në atmosferë është me interes të lartë si për sigurinë kombëtare ashtu dhe për sigurinë e mjeteve fluturuese. Çdo rezultat i dalë nga ky studim do të shpërndahet më vonë me publikun.
Pjesë e të dhënave të grumbulluara mbi fenomenet e panjohura ajrore do të jenë filmimet e ndryshme të siguruara nga civilët, qeveria, kompanitë apo astronautët që janë përballur me objekte të tilla në hapësirë.
“Një ndër gjërat kryesore që ne shpresojmë të arrijmë në këtë studim, thjesht duke folur hapur rreth tij, është të ndihmojmë në eleminimin e një pjese të stigmës që shoqërohet me këtë fenomen, dhe kjo do të vijë sigurisht përmes aksesit të rritur në të dhënat, më tepër raportimi dhe më tepër gjetje.” tha Daniel Evans, zyrtar në NASA’s Science Mission Directorate.
Agjencia hapësinore e SHBA ka konfirmuar se aktualisht nuk ka asnjë provë se UAP kanë një origjinë jashtë tokësore, mirëpo numri i limituar i kërkimeve e bën të vështirë arritjen e një konkluzioni të tillë.
