Mijëra punonjës të Tesla Inc. në Shanghai do të kenë mundësinë të rikthehen në shtëpitë e tyre duke filluar nga dita e premte, duke u larguar nga flluska e fabrikës për herë të parë pas disa javësh, pasi prodhuesi i makinave elektrike pritet t’i rikthehet një plani normal prodhimi.
Tesla i tha punonjësve që kanë jetuar disa javë të akomoduar në ambientet e punës se duke mbajtur të njejtin ritëm pune ato do të kenë mundësinë të shkojnë në shtëpitë e tyre që nga dita e premte kur turni i tyre të përfundojë.
E gjithë kjo nismë u ndërmorr nga Tesla gjatë muajit për shkak të rregullave të reja parandaluese që qeveria e Kinës mori për të parandaluar përhapjen e COVID-19. Me rastet që tashmë janë shumë më të ulëta, qendra financiare kineze ka lehtësuar disa nga pengesat duke lejuar një lëvizje më të lehtë për qytetarët. Kompania ka më tepër se 10,000 punonjës në fabrikën në Shanghai, e cila prodhon Tesla Model 3 dhe Model Y për tregun kinez dhe për eksport.
Grupi i parë i punonjësve që do të shkojnë në shtëpi do të qëndrojnë atje për 4 ditë para se të rikthehen sërisht në 15 qershor në punë. Për të akomoduar punonjësit, Tesla ka shfrytëzuar ambientet e fabrikave jo në punë apo kampeve të vjetra ushtarake, me punonjësit e turneve të ndryshme që duhet të përdorin së bashku shtretërit në këto hapësira.
