Ford ka nisur testimin e një teknologjie të re e cila do të limitiojë automatikisht shpejtësinë e makinave kur ato të gjenden në një ambient të caktuar, për të rritur sigurinë e njerëzve. Kjo skemë përdor “kufinjtë virtual” për të përcaktuar zonat me lëvizje të madhe këmbësorësh, dhe në këtë mënyrë software-i limiton shpejtësinë në mënyrë automatike.
Zona të tilla mund të jenë shkollat, spitalet apo qendrat tregtare, ku prania e këmbësorëve është e shtuar. Në këtë mënyrë kjo teknologji mund t’i japë fund përdorimit të tabelave për limitimin e shpejtësisë, duke parandaluar drejtuesit që të drejtojnë makinën në mënyrë të shkujdesur pranë zonave me rrezikshmëri më të lartë (madje duke i shpëtuar ato dhe nga gjobat e tejkalimit të shpejtësisë).
“Kjo teknologji ka një potencial të provuar për të përmirësuar drejtimin e përditshëm të makinave, duke e bërë atë më të lehtë dhe më të sigurtë për të gjithë, jo vetëm për personin pas timonit.” tha Michael Huynh.
Aktualisht kjo teknologji po testohet në Koln, Gjermani, në fugonët E-Transit tërësisht elektrikë. Kufinjtë virtualë apo “Geofences” janë vendosur në të gjitha zonat ku shpejtësia maksimale e lejuar është 30km/h në qendër të qytetit dhe në vende të tjera të caktuara.
Makina automatikisht redukton shpejtësinë pasi futet në këtë zonë, por drejtuesi i makinës mund ta anashkalojë këtë masë të ndërmarrë.
