NASA po ofron $70,000 në çmime për të gjithë zhvilluesit që mund të dizenjojnë metaverse-in më të mirë Marsian që do të përgatisë astronautët për misionet në të ardhmen. Kjo agjenci tregoi se “qëllimi është krijimi i një eksperience gjithëpërfshirëse, tërheqëse dhe realistike që do të ndihmojë në parapërgatitjen e astronautëve për eksperiencat dhe situatat që do të hasen në Planetin e Kuq.”
Zyrtarët kanë nisur bashkëpunimin për krijimin e botës virtuale me Buendea dhe Epic Games. Që të dyja kompanitë kanë kompletuar pjesërisht një version virtual të Marsit. Bota virtuale është zhvilluar duke përdorur Unreal Engine 5 të Epic Games, një platformë që është përdorur nga shumë kompani për krijimin e ambienteve të realitetit virtual.
Deri më tani ky program ka krijuar kushte reale të gravitetit dhe motit në një terren 248 km2 të planetit. Gjithashtu ky program ka rikrijuar ngjyrimin origjinal të planetit, me një nuancë portokalli që shndërrohet në blu gjatë natës.
Zhvilluesit kanë si detyrë të dorëzojnë dizajne të ndryshme në 5 kategori: kërkime shkencore, eksplorim, krijimi i një kampi, mirëmbajtja e tij dhe “elementi surprizë”. Fituesi i çdo kategorie do të fitojë $6,000, ndërkohë që shuma e plotë prej $70,000 do të ndahet midis 20 çmimeve individuale.
