Dyson ka vendosur që të futet në tregun e kufjeve përmes një produkti të ri të çuditshëm të quajtur Dyson Zone. Këto kufje wireless vijnë me active noise cancelling dhe teknologji për pastrimin e ajrit të përfshirë në këtë pajisje.
Ky është vetëm prezantimi i parë i kufjeve The Zone, pasi ende nuk janë publikuar të dhëna specifike si pesha e këtyre kufjeve, kohëzgjatja e baterisë apo dhe çmimi i tyre. Qëllimi i Dyson është që të bëjë jetesën në zonat urbane më të rehatshme duke zbutur përmes një produkti të vetëm ndotjen e ajrit dhe atë akustike.
Dyson Zone përdor një version të zvogëluar të teknologjisë ekzistuese të filtrimit të ajrit. Ajri tërhiqet nga kufjet duke përdorur disa kompresorë të vegjël. Më pas filtrohet dhe shkon drejt pjesës së hundës, e cila nuk është në kontakt me fytyrën si një maskë, në mënyrë që ky ajër të thithet nga përdoruesi.
Nëse ju dëshironi të përdorni vetëm pjesën e kufjeve, ju mund të çinstaloni pjesën shtesë pasi ajo është e lidhur përmes disa magnetëve. Sigurisht që kur e përdorni pjesën e filtrimit të ajrit, ju mund ta lëvizni atë poshtë për të komunikuar më lehtë me njerëzit.
Dyson thotë se The Zone mund të filtrojë deri në 99% të grimcave të ajrit, dhe se filtrat do të duhet të ndërrohen çdo vit.
