Pas deklaratave të bëra nga aktivistët në Physicians Committee for Responsible Medicine se majmunët e testuar nga Neuralink ishin torturuar, kompania u detyrua të publikonte një deklaratë mbi politikat e mirëqenies që ato ndjekin për kafshët që testohen.
Të dhënat e dorëzuara në ankesën e PCRM tregonin se në bazë të të dhënave publike të UC Davis, që ka bashkëpunuar me neuralink në zhvillimin e eksperimenteve, 15 nga 23 majmunët e testuar kishin ngordhur, dhe shumë prej tyre kishin dëmtime të ndryshme fizike dhe në sjellje.
Neuralink publikoi një postim në blogun e kompanisë në 14 shkurt ku detajonte përgjigjen direkte kundrejt këtyre akuzave. “Testimi mbi kafshët është një praktikë e ndjekur prej kohësh në fushën e zhvillimeve mjekësore, dhe si kompani ne jemi tërësisht të vendosur që të punojmë me kafshët në mënyrën më humane dhe më etike të mundshme.” shkruajti Neuralink.
Kompania shtoi gjithashtu se të gjitha veprimet e kryera mbi këto majmunë në UC Davis ishin të aprovuara nga komiteti i universitetit, siç mandaton ligji. “Ne thërritëm inspektorët e United States Department of Agriculture për të siguruar se ne kemi të gjitha mjetet e nevojitura të përshkruara në aktin e Animal Welfare.”
PCRM iu përgjigj menjëherë këtyre deklaratave duke thënë se në to nuk përmendet asnjëherë dhimbja e shkaktuar e majmunëve dhe as muajt e vuajtjes të shkaktuara nga testimet.
