Teleskopi hapësinor James Webb vazhdon të zbulojë gjëra të reja rreth universit tonë dhe më gjerë, por një nga zbulimet e tij të fundit është “një pikëpyetje”. Në fund të muajit të kaluar, ekipi i teleskopit hapësinor James Webb (JWST) në Agjencinë Evropiane të Hapësirës (ESA) publikoi një imazh që ofron një pamje të detajuar të dy yjeve të rinj në formim aktiv. Dhe ndërsa fotografia është mahnitëse, në sfond shfaqet një pikëpyetje gjigante kozmike rreth së cilës u ngritën shumë pyetje.
Sipas Space Telescope Science Institute (STScI) në Baltimore, i cili është përgjegjës për operacionet e JWST, shpjegimi më i mundshëm është se pikëpyetja është në fakt një galaktikë e largët ose dy galaktika që ngatërrohen në tërheqjen gravitacionale të njëra-tjetrës. “Është ndoshta një galaktikë e largët, ose galaktika potencialisht ndërvepruese (ndërveprimet e tyre mund të kenë shkaktuar një formë të shtrembëruar të pikëpyetjes),” thanë përfaqësuesit e STScI për Space.com.
“Kjo mund të jetë hera e parë që ne kemi parë këtë objekt të veçantë,” shtoi STScI. “Do të kërkohet një ndjekje shtesë për të kuptuar se çfarë është me ndonjë siguri. Webb po na tregon shumë galaktika të reja, të largëta – kështu që ka shumë shkencë të re për të bërë!”
Astronomët theksojnë se ngjyra e pikëpyetjes është një nga të dhënat më të mëdha – nuanca e kuqe sugjeron që objekti është mjaft i largët dhe i ngjan galaktikave të tjera në hapësirën e thellë të kapura vitin e kaluar nga kamerat e JWST.
