Që nga prezantimi i ChatGPT, mënyra se si ndërveprojmë me teknologjinë ka ndryshuar ndjeshëm—duke ndikuar në të shkruarit, kërkimin në internet dhe bisedat tona. Por një studim i ri (PDF) tregon se ndikimi i ChatGPT shkon edhe më thellë: AI po ndikon mënyrën se si flasim.
Studiuesit në Institutin Max Planck për Zhvillimin e Njeriut në Gjermani zbuluan se disa fjalë të përdorura shpesh nga ChatGPT, të quajtura “fjalë GPT”, janë bërë më të shpeshta në të folurën e njerëzve. Fjalët në gjuhën angleze si delve, realm, meticulous, underscore dhe bolster janë përdorur më shumë në video në YouTube dhe podkaste pas debutimit të ChatGPT.
Studiuesit analizuan miliona faqe tekstesh dhe i kërkuan ChatGPT të “përmirësonte” gjuhën e tyre. Pastaj identifikuan fjalët që përdorte më shpesh. Më pas, analizuan mbi 360,000 video YouTube dhe 771,000 episode podkastesh, para dhe pas daljes së ChatGPT. Edhe pas filtrimit të sinonimeve, përdorimi i fjalëve GPT ishte në rritje.
Sipas studimit, është krijuar një loop kulturor ku modelet e AI që mësojnë nga gjuha njerëzore, në mënyrë të ndërsjellë ndikojnë prapë gjuhën tonë. Levin Brinkmann thekson se njerëzit imitojnë ata që i perceptojnë si inteligjentë—dhe sot, kjo përfshin edhe AI-në.
Edhe pse studimi fokusohet në gjuhë formale dhe modele specifike të GPT-së, tregon qartë se AI po fiton rol si autoritet kulturor, me ndikim në gjuhë dhe komunikim. Ekspertët sugjerojnë që është e rëndësishme të vëzhgojmë me kujdes ndikimin e saj në kulturë, komunikim dhe mendjen njerëzore.
