Shkencëtarët kanë zbuluar një mënyrë të re se si të ulin ndotjen atmosferike nga dioksidi i karbonit që emëtohet në ajër, duke e shndërruar atë në bikarbonat natriumi (sodë buke) dhe duke e ruajtur atë në oqeane.
Kjo teknikë mund të jetë deri në 3 herë më efiçiente se teknologjitë që ne përdorim aktualisht për kapjen e dioksidit të karbonit në ajër, siç tregon dhe autori i studimit të publikuar në revistën Science Advances.
Për t’u përballur me këtë krizë klimatike ne duhet me patjetër që të reduktojmë përdorimin e lëndëve djegëse. Megjithatë, njerëzit kanë përdorur lëndët djegëse prej shumë vitesh, dhe është e pamundur që me teknikat aktuale të shikojmë një ndryshim për mirë të ngrohjes globale gjatë 2-3 viteve të ardhshme.
Është natyra ajo që proçeson automatikisht dioksidin e karbonit të lëshuar në ajër, por për fat të keq nuk është në gjendje që të filtrojë këtë sasi kaq të madhe dioksidi karboni që ne po emëtojmë në një kohë shumë të shkurtër. Prandaj, lind nevoja për zhvillimin e teknologjive të reja të cilat bëjnë të mundur kapjen e këtij gazi nga ajri.
Teknika e re e kapjes së dioksidit të karbonit nga ajri dhe shndërrimi i këtij gazi në sodë buke duket një teknikë shumë më efektive se metodat e tjera. Autori i studimit, Arup SenGupta tregon se kjo teknologji kërkon materiale me kosto tepër të lira për t’u krijuar, si dhe ka një kapacitet më të madh të pastrimit të ajrit. Lëshimi në oqeane i sodës së bukës do të bëhet në mënyrë të kontrolluar, në mënyrë që përqëndrimi në ujë të ketë sa më pak ndryshim.
