Laboratori i Shkencave Kompjuterike dhe Inteligjencës Artificiale (CSAIL), pjesë e Massachusetts Institute of Technology (MIT) në Shtetet e Bashkuara ka gjetur një mënyrë për të mbrojtur fotot tuaja nga manipulimi që AI mund të bëjë.
I quajtur PhotoGuard, ky shërbim parandalon keqpërdorimin e fotove tuaja duke ndryshuar pikselët në një imazh në një mënyrë që e bën të vështirë për AI të kuptojë. Ato janë të padukshme për syrin e njeriut, por mund të lexohen nga AI, duke ja vështirësuar punën inteligjencës artificiale.
Kjo shërbim vjen pas avancimit të vazhdueshëm të inteligjencës artificiale gjeneruese, e cila rrezikon që fotot tona të manipulohen dhe përdoren kundër nesh. Ne e kemi parë tashmë këtë në veprim, që nga Papa Françesku i veshur me një xhup Moncler e deri tek një Mark Zuckerberg i rremë që tregon se si e kontrollon botën.
Një mënyrë për ta parandaluar modifikimin e fotove është duke përdorur një metodë “encoder” e cila ndryshon informacionin që përshkruan pozicionin dhe ngjyrën e pikselëve në një imazh. Ky ndryshim e pengon AI të kuptojë se çfarë po shikon.
Metoda e dytë e njohur si “difuzioni” maskon imazhin si një tjetër në sytë e një AI. Kjo bëhet duke marrë informacion nga një imazh tjetër i synuar dhe duke ndryshuar pikselët në burim që t’i ngjajnë atij, gjë që maskon imazhin në sytë e AI.
Hadi Salman, autori kryesor i punimit dhe një student i doktoraturës në MIT, tha se një “qasje bashkëpunuese që përfshin zhvilluesit e modeleve, platformat e mediave sociale dhe politikëbërësit paraqet një mbrojtje të fortë kundër manipulimit të paautorizuar të imazhit“.
Këto teknika janë efektive por mund të manipulohen nga palët e treta. Një person keqdashës mund të ndryshojë informacionin e imazhit duke e prerë, duke rrotulluar pamjen ose duke shtuar zhurmë dixhitale në të. Salman pranoi se, “duhet shumë punë për ta bërë këtë mbrojtje praktike”. Kompanitë që zhvillojnë këto modele duhet të investojnë në krijimin e sistemeve të fuqishme kundër kërcënimeve të mundshme që vijnë nga këto mjete të AI.
