CEO i Figure AI, Brett Adcock, ka prezantuar publikisht aftësitë e fundit të robotit humanoid Figure 02. Në një video të postuar në X, roboti shihet duke marrë rroba nga një shportë dhe duke i vendosur në lavatriçe. Edhe pse nuk mund ta operojë plotësisht pajisjen vetë, ky veprim përfaqëson një hap të madh drejt automatizimit të punëve shtëpiake.
Në qendër të funksionimit të tij është Helix, modeli Vision-Language-Action i prezantuar në shkurt 2025, i cili bashkon perceptimin, gjuhën dhe të kuptuarit njerëzor. Helix ofron kontroll të avancuar për manipulimin e pjesës së sipërme të trupit, mund të drejtojë dy robotë njëkohësisht dhe të mundësojë bashkëpunimin mes tyre. Figure 02 tashmë po testohet si në shtëpi ashtu edhe në mjedise zyre, duke treguar konsistencë në kryerjen e detyrave.
Reagimet në rrjete sociale kanë qenë pozitive, me përdorues që shprehin admirim dhe kureshtje mbi funksionalitetet e ardhshme, si p.sh. aftësia për të palosur rrobat. Disa madje janë shprehur të gatshëm ta blejnë sapo të dalë në treg.
Në aspektin konkurrues, 1X Technologies po zhvillon robotin Neo Gamma për përdorim shtëpiak, ndërsa Boston Dynamics ka Atlas për mjedise industriale. Figure 02 synon të ofrojë një kombinim të dy qasjeve, me përdorim si në industri ashtu edhe në shtëpi. Roboti ka kryer prova në fabrikën e BMË në Karolinën e Jugut dhe është përdorur për detyra si punë në linja transportuese, ngritje dhe ndarje objektesh.
E ardhmja e kompanisë përfshin Figure 03, një model i ri që pritet të avancojë aftësitë e Figure 02 me lëvizshmëri më të mirë, AI më inteligjent dhe kapacitet për detyra më komplekse. Ai mund të jetë i përshtatur për role të specializuara, përfshirë ndihmën në mjedise mjekësore ose në zona të rrezikshme ku kërkohet saktësi dhe besueshmëri.
