Departamenti i Policisë në San Francisco (SFPD) ka propozuar një politikë të re që do t’i japë leje robotëve për të vrarë, siç raportohet nga Mission Local. Në këtë draft, ku sqarohet se si SFPD mund të përdorë armë ushtarake, tregohet se robotët mund të “përdoren si një forcë vdekjeprurëse kur rrezikimi i jetës së oficerëve apo personave të tjerë në publik është i pashmangshëm dhe nuk ka asnjë opsion tjetër”.
Anëtarët e komitetit Board of Supervisors Rules Committee e kanë studiuar këtë politikë të re prej disa javësh. Në draftin origjinal nuk përmendej asnjë fjalë mbi robotët “vrasës”, deri në momentin që drejtuesi i Board of Supervisors shtoi se “robotët nuk duhet të përdoren si një mjet force kundër asnjë personi”.
Megjithatë, SFPD riktheu draftin e upate-uar me një vizë të kuqe mbi këtë fjali, duke shtuar se robotët mund të kenë autoritetin për të vrarë personat e dyshuar.
SFPD aktualisht zotëron 17 robotë që komandohen nëpërmjet telekomandave, prej të cilëve vetëm 12 në gjendje funksionale. Shumica e këtyre robotëve kanë si qëllim çaktivizimin e bombave, mirëpo modelet e reja Remotec kanë një sistem opsional armësh që mund të qëllojë plumba shotgun-i.
“SFPD ka patur gjithmonë aftësinë për të përdorur forcë vdekjeprurëse kur rreziku i humbjes së jetës së personave në publik apo oficerëve është i pashmangshëm dhe nuk ekziston asnjë opsion tjetër,” tha oficeri Eve Laokwansathitaya.
Departamenti i Policisë në Dallas përdori një robot me forcë vdekjeprurëse në 2016. Roboti ishte i pajisur me një pajisje shpërthyese për të vrarë një person të dyshuar që kishte vrarë 5 oficerë policie dhe kishte plagosur shumë të tjerë.
