Elon Musk njihet si njeriu i inovacionit ama kush e ndjek edhe nëpër rrjete sociale e di shumë mirë që është i famshëm edhe për grindjet e tij online.
Pakënaqësitë e tij ndaj Facebook kanë qenë të hapura gjithmonë, kujtojmë këtu fillimin e vitit ku i sugjeroi të gjithë fansave të tij të fshijnë llogarinë e tyre në FB sepse është një platformë kot.
Sherri i radhës ka nisur kur shefi i sektorit të Artificial Intelligence të FB Jerome Pesenti është shprehur se këndvështrimet e Musk për AI janë pa bazë.
Më herët Elon Musk ka deklaruar se Inteligjenca Artificiale mund të arrijë nivelin njerëzor dhe madje të kërcënojë ekzistencën humane.
I pyetur për këtë çështje Pesenti ka thënë se “një pjesë e madhe e komunitetit e sheh Musk-un si një shpërqëndrim. Ai është sensacionalist, nga njëra anë flet hapur për shqetësimet e tij për teknologjinë nga ana tjetër flet për AGI (Artificial General Intelligence).
Ai as që ia ka idenë se çfarë është AI. Nuk ekziston diçka e tillë si AGI dhe ne nuk jemi aspak afër arritjes së inteligjencës humane.”
AGI është vetë koncepti se një makineri mund të mësojë çfarëdolloj gjëje që një njeri mundet.
Musk u përgjigj me një: Facebook është kot në Twitter.
Kompania vetë refuzoi të prononcohet publikisht, por vetë Pesenti u përgjigj duke thënë se ky është mendimi i tij personal.
Mendim ama i mbështetur edhe nga shumë intelektualë të tjerë të fushës, Yann LeCun, profesor i New York University dhe shkencëtar AI në Facebook, dhe Edward Grefenstette studiues për Facebook AI.
Elon Musk dhe shpërndarja e tij në shumë fusha njëheresh bëhen vërtetë të vështira për tu ndjekur ndonjëhere.
