Inteligjenca artificiale nëse lihet e pakontrolluar mund të përbëjë një rrezik serioz për demokracinë dhe paqen, kanë paralajmëruar Kombet e Bashkuara.
Sekretari i Përgjithshëm i OKB-së Antonio Guterres i bëri komentet ndërsa një panel ekspertësh paralajmëroi për rreziqet e falsifikimit gjithnjë e më realist, si dhe evolucionin e armëve autonome dhe përdorimit të AI nga grupet kriminale dhe terroriste. Grupi bëri thirrje për një bashkëpunim më të madh global mbi teknologjinë dhe tha se zhvillimi i saj nuk duhet t’i lihet forcave të tregut.
Paneli prej rreth 40 ekspertësh nga fusha e teknologjisë, ligjit dhe mbrojtjes së të dhënave u krijua nga Guterres në tetor. Raporti i tyre ngriti alarmin për mungesën e rregullimit global të AI si dhe përjashtimin efektiv të vendeve në zhvillim nga debatet për të ardhmen e teknologjisë. Nga 193 anëtarët e OKB-së, vetëm shtatë janë pjesë e shtatë nismave kryesore të lidhura me AI.
“Ka sot një deficit të rregullimit global në lidhje me AI, e cila për nga natyra e saj është ndërkufitare, paralajmërojnë ekspertët në raportin e tyre. AI duhet t’i shërbejë njerëzimit në mënyrë të barabartë dhe të sigurt“, tha Guterres këtë javë. “Nëse lihen të pakontrolluara, rreziqet që vijnë nga inteligjenca artificiale mund të kenë implikime serioze për demokracinë, paqen dhe stabilitetin”.
Në sfondin e thirrjes së tij të qartë, ekspertët u bënë thirrje anëtarëve të OKB-së që të vendosin mekanizma për të krijuar një bashkëpunimit global për këtë çështje, si dhe për të parandaluar përhapjen e paqëllimshme.
“Zhvillimi, vendosja dhe përdorimi i një teknologjie të tillë nuk mund t’i lihet vetëm tekave të tregjeve,” thotë raporti. Ai bëri thirrje fillimisht për krijimin e një grupi ekspertësh shkencorë mbi AI të modeluar në forumin e ekspertëve të Panelit Ndërqeveritar për Ndryshimet Klimatike (IPCC), raportet e të cilëve janë fjala e fundit për çështjen e ndryshimeve klimatike. Paneli do të informojë komunitetin ndërkombëtar mbi rreziqet në zhvillim, do të identifikojë nevojat kërkimore si dhe se si mund të përdoret për të lehtësuar urinë, varfërinë dhe pabarazinë gjinore, ndër të tjera.
