Studiuesit nga Chalmers University of Technology në Suedi kanë dizenjuar një sistem për depozitimin e energjisë diellore në një formë likide deri në 18 vite.
Me ndihmën e shkencëtarëve nga Jiao Tong University, ekipi i Chalmers ka testuar këtë pajisje, të quajtur Molecular Solar Thermal System (MOST) duke e lidhur atë me një gjenerator termoelektrik dhe arritën të provonin se mund të prodhonin elektricitet sipas kërkesës.
Kjo teknologji ka qenë në zhvillim e sipër për më tepër se një dekadë, dhe besohet se ajo do të mund të përdoret së shpejti për karikimin e pajisjeve elektronike me energji të ulët. Sistemi u dizenjua duke përdorur molekula të zhvilluara specifikisht të karbonit, hidrogjenit dhe azotit.
Kur ato goditen nga rrezet e diellit, atomet brenda molekulave ndryshojnë formën e tyre, duke u shndërruar në një izomer me shumë energji në trajtë të lëngshme. Fakti më interesant është se ky sistem mund ta ruajë energjinë në trajtë të lëngshme deri në 18 vite.
“Gjeneratori është një proçesor shumë i hollë i cili mund të integrohet në pajisje të ndryshme elektrike si kufjet, orat smart apo telefonët.” tha Zhihang Wang. “Deri më tani, ne kemi arritur të gjenerojmë sasi të vogla elektriciteti, por këto rezultate tregojnë se koncepti funksionon në të vërtetë. Ky zbulim duket shumë premtues.” shtoi ai.
