Inteligjenca artificiale është tashmë e pranishme kudo, dhe së shpejti do të mund të aksesohet dhe nga kyçi juaj. Apple po punon për të krijuar disa versione të Apple Watch që kanë të integruar një kamera dhe Apple Intelligence.
Kamera do të ndihmojë pajisjen “të shohë botën e jashtme”, sipas Mark Gurman të Bloomberg. Ky version i inteligjencës artificiale do të shkonte paralelisht me teknologjinë ekzistuese të inteligjencës vizuale të Apple, të cilën kompania gjithashtu synon ta sjellë në AirPods. Për momentin, Visual Intelligence mbështetet shumë në ChatGPT dhe Google.
Sipas Gurman, megjithatë, kompania dëshiron ta kryejë të gjithë këtë proces me shërbimet e krijuara vetë: Plani përfundimtar i Apple për Visual Intelligence shkon shumë përtej iPhone. Kompania dëshiron ta shndërrojë këtë shërbim në themelin e pajisjeve të ardhshme, duke përfshirë AirPods të pajisura me kamera.
Gjatë rrugës, Apple dëshiron gjithashtu të zhvendosë Visual Intelligence drejt modeleve të veta të AI, pa shfrytëzuar OpenAI dhe Google.
Sa i përket modeleve të Apple Watch me kamera, Gurman raporton se Apple po punon për të si për modelet standarde ashtu edhe ato Ultra të Apple Watch. Me Apple Watch standard, kamera do të vendoset brenda ekranit, ngjashëm me një iPhone. Është e paqartë nëse kamera do të integrohet nën ekran, ose do të zë një hapësirë specifike në ekran.
Në versionin Ultra, kompania planifikon ta vendosë atë në pjesën anësore të orës, pranë kurorës dixhitale dhe butonit anësor. Apple ka të ngjarë ta bëjë këtë sepse ka më shumë hapësirë për të punuar. Gurman thotë se përdoruesit e Ultra do ta kishin më të lehtë të drejtonin kyçin e dorës drejt gjërave për të skanuar. Megjithatë jemi ende larg implementimit të kësaj teknologjie, me Gurman që tregon se nuk do të mund ta testojmë diçka të tillë deri në vitin 2027.
