ViennaUP u rikthye në vitin 2026 plot energji, duke konfirmuar rolin si një nga eventet më të rëndësishme të inovacionit në Evropë. Më shumë se 14,000 pjesëmarrës nga mbi 90 vende dhe 28 delegacione ndërkombëtare morën pjesë në festival, i cili mblodhi CEO, themelues startup-esh, investitorë dhe entuziastë të teknologjisë nga e gjithë bota në Bashkinë e Vjenës për hapjen zyrtare.
Gjatë pesë ditëve kryesore të festivalit, të paraprira nga “WarmUP Weekend”, u zhvilluan mbi 65 evente në 43 lokacione të ndryshme në të gjithë qytetin, ku shumica e tyre ishin të rezervuara plotësisht. Të dhënat paraprake u publikuan nga Vienna Business Agency, e cila e inicioni festivalin vjetor dhe e organizon atë në bashkëpunim me 45 partnerë nga ekosistemi lokal dhe ndërkombëtar i startup-eve.
Për dy themeluese femra, Julia Reisinger dhe Maria Zahlbruckner nga startup-i deep-tech me bazë në Vjenë, factorymaker, ky edicion ishte realizim i një ëndrre. Ato fituan finalen austriake të Startup World Cup falë një platforme planifikimi industrial të mbështetur nga inteligjenca artificiale, duke siguruar një biletë për në Silicon Valley. Dyshja do të përfaqësojë Austrinë në finalen globale në San Francisko, ku do të konkurrojë për një çmim investimi prej një milion dollarësh.
Sipas Barbara Novak, Zv/Kryetares së Bashkisë së Vjenës dhe Këshilltares për Çështjet Ekonomike, mbi 14,000 profesionistë biznesi vizituan ViennaUP për të ndërtuar partneritete të reja dhe për të eksploruar Vjenën si një destinacion potencial biznesi. Ajo theksoi se vetëm vitin e kaluar, 7.6 milionë euro investime të gjeneruara nga kompani të vendosura në Vjenë lidhen drejtpërdrejt me festivalin. Njëkohësisht, ViennaUP u vlerësua si shembull i politikave moderne ekonomike, ku inovacioni shërben si për rritjen ekonomike, ashtu edhe për mirëqenien shoqërore.
Fokus në rritje, shëndeti dhe sovranitet digjital
ViennaUP 2026 vendosi theks të veçantë tek shkallëzimi dhe rritja e startup-eve, me vëmendje ndaj teknologjive të së ardhmes si AI, shëndetit, financimi dhe impakti social. Formate si Connect Day, Impact Days dhe Female Founders Experience bashkuan themelues, investitorë dhe ekspertë nga sektorë të ndryshëm. Një temë e rëndësishme këtë vit ishte edhe sovraniteti digjital, ku në kuadër të World Summit Awards Global Congress u prezantuan zgjidhje digjitale me vlerë sociale, që synojnë ta bëjnë Evropën më pak të varur nga platformat globale.
Në festival morën pjesë edhe 28 delegacione ndërkombëtare nga Europa Qendrore dhe Lindore, si dhe nga vende si India dhe Koreja. Përmes Vienna Startup Package, 15 startup-e ndërkombëtare u bënë pjesë e festivalit, përfshirë CheckEye nga Ukraina, një startup që përdor inteligjencën artificiale për analizën e imazheve të retinës dhe zbulimin e hershëm të sëmundjeve si retinopatia diabetike.
Me këtë edicion, ViennaUP konfirmoi se Vjena po shndërrohet gjithnjë e më shumë në një pikë referimi për inovacionin, teknologjinë dhe startup-et në nivel global.
