Meta është në bisedime me Google për një marrëveshje shumëvjeçare me vlerë miliarda dollarë për blerjen e çipave të Alphabet që nga viti 2027, sipas një raporti të The Information. Marrëveshja e mundshme do ta fuste Google si një konkurrent serioz ndaj Nvidia, prodhuesit më të rëndësishëm të procesorëve për qendrat e të dhënave që fuqizojnë inteligjencën artificiale.
Bisedimet përfshijnë gjithashtu marrjen me qera të çipave të Google Cloud që nga viti i ardhshëm. Ky plan është pjesë e strategjisë së Google për të nxitur përdorimin e Tensor Processing Units (TPUs), çipa të optimizuar për AI, jo vetëm brenda qendrave të veta të të dhënave, por edhe tek klientët që ndërtojnë infrastrukturën e tyre. Një hap i tillë do të përfaqësonte një largim të rëndësishëm nga praktika aktuale e Google dhe mund të zgjerojë ndjeshëm tregun për çipat e saj.
Sipas raportit, disa drejtues të Google Cloud besojnë se kjo strategji mund t’i sjellë kompanisë deri në 10% të të ardhurave vjetore të Nvidia-s, që përkthehet në miliarda dollarë. Lajmi ndikoi menjëherë në tregjet financiare: aksionet e Alphabet u rritën mbi 4% në tregtimin paraprak, duke e çuar kompaninë drejt një vlere rekord prej 4 trilionë dollarësh; Broadcom, që bashkëpunon me Google në prodhimin e çipave AI, u rrit me 2%, ndërsa Nvidia ra me mbi 3%.
Për Google, sigurimi i një marrëveshjeje me Meta, një nga klientët më të mëdhenj të Nvidia, me 72 miliardë dollarë të planifikuara për investime këtë vit, do të ishte një arritje madhore. Kjo vjen në një moment kur kërkesa për çipa të personalizuar si TPUs është rritur ndjeshëm, ndërsa kompanitë kërkojnë alternativa më të lira dhe më të aksesueshme se GPU-të e Nvidia-s.
Megjithatë, sfida kryesore për Google mbetet dominimi afatgjatë i Nvidia-s, i cili mbështetet nga ekuosistemi i gjerë CUDA, i përdorur nga mbi 4 milionë zhvillues në mbarë botën.
