Zhvilluar nga kompania britanike Bo, skuteri futuristik The Turbo arrin një shpejtësi marramendëse prej 135 km/h, dhe kompania synon të thyejë rekordin botëror me 160 km/h nën mbikëqyrjen e Guinness World Records.
I ndërtuar nga alumin i përdorur në industrinë ajrore, The Turbo ka një sistem shtytës me dy motorë me fuqi totale 24,000W dhe një bateri 1,800Wh — mjaftueshëm për të karikuar shpejt 1,500 smartphone njëherësh. Me një karikim të vetëm, ai përshkon deri në 240 km, shumë më tepër se distanca mesatare 25–65 km e skuterëve të zakonshëm.
Bo e zhvilloi skuterin për 18 muaj dhe e testoi në pistën e famshme Goodwood në Mbretërinë e Bashkuar, me pilotin profesionist Tre Whyte. Çmimi i tij bazë është 27,500 euro, çka e bën të paarritshëm për përdoruesit e zakonshëm.
Për të garantuar sigurinë, kompania ka vendosur kufizime: blerësit duhet të dëshmojnë përvojën e mëparshme në drejtimin e mjeteve të ngjashme përmes faqes zyrtare. Kjo masë vjen pas rritjes së shqetësimeve për sigurinë publike në Mbretërinë e Bashkuar dhe më gjerë, ku përdorimi i skuterëve elektrikë jashtë rregullave ka shkaktuar frikë dhe po bëhen thirrje për ndalimin e përdorimit të tyre.
Një fushatë e organizatës Crimestoppers po inkurajon qytetarët të raportojnë përdorimin e rrezikshëm dhe të paligjshëm të mjeteve elektrike në zona rezidenciale, trotuare dhe parqe. Këto aktivitete jo vetëm që rrezikojnë njerëzit, por dëmtojnë edhe mjedisin dhe trashëgiminë kulturore.
Ndërsa Bo synon të transformojë skuterin nga mjet transporti në një “makinë performancash”, mbeten dilemat nëse këto “përbindësha” duhet të lejohen në rrugët e qytetit.
