Komisioni Evropian ka konstatuar se disa faqe të mëdha pornografike nuk po mbrojnë në mënyrë të mjaftueshme të miturit nga përmbajtjet pornografike dhe mund të kenë shkelur legjislacionin evropian. Sipas gjetjeve paraprake, këto platforma mbështeten kryesisht te vetëdeklarimi i përdoruesve për moshën, përmes një klikimi të thjeshtë që konfirmon se janë mbi 18 vjeç, gjë që Komisioni e konsideron joefektive për mbrojtjen e fëmijëve.
Komisioni vlerëson se edhe masa të tjera të përdorura nga këto faqe, si faqet e turbullta apo etiketat paralajmëruese, nuk ofrojnë mbrojtje reale për të miturit. Hetimi u nis në maj të vitit të kaluar në bazë të Digital Services Act (DSA), ligji i BE-së që rregullon funksionimin e platformave online dhe detyrimet e tyre për sigurinë e përdoruesve.
Vlerësimi i Komisionit është mbështetur në raporte të brendshme të rrezikut, të dhëna dhe dokumente të tjera të mbledhura gjatë një viti nga vetë platformat. Sipas autoriteteve, kur në këto raporte janë identifikuar rreziqe, kompanitë janë përqendruar më shumë te shqetësimet e biznesit, si dëmtimi i reputacionit, sesa te pasojat që përmbajtja e tyre mund të ketë për përdoruesit e rinj.
Gjetjet paraprake u kërkojnë platformave të zbatojnë sisteme të forta dhe të besueshme të verifikimit të moshës, me qëllim ndalimin e aksesit të fëmijëve. Faqet kanë të drejtë të përgjigjen me shkrim dhe të shpjegojnë se si do të përmbushin kërkesat. Nëse konstatohet mosrespektim, Komisioni Evropian mund të vendosë gjoba deri në 6% të xhiros vjetore globale. Paralelisht, autoritetet kombëtare po ndërmarrin veprime të koordinuara edhe ndaj platformave më të vogla pornografike që nuk respektojnë DSA-në.
