Intel do të bashkohet me SpaceX dhe Tesla në një projekt ambicioz për ndërtimin e një fabrike të re të procesorëve gjysmëpërçuesve në Teksas, SHBA, megjithëse detajet mbi rolin e saktë të Intel mbeten të paqarta. Në një deklaratë publike, kompania theksoi se aftësitë e saj në projektimin, prodhimin dhe paketimin e çipave me performancë shumë të lartë do të ndihmojnë në realizimin e objektivit të projektit “Terafab”, i cili synon të prodhojë kapacitet llogaritës prej 1 teravat në vit për zhvillimet e ardhshme në inteligjencën artificiale dhe robotikë.
Ideja për këtë bashkëpunim u prezantua fillimisht nga Elon Musk, i cili synon të zhvillojë çipa për përdorime të ndryshme, përfshirë inteligjencën artificiale, satelitët dhe madje edhe një qendër të dhënash në hapësirë. Projekti gjithashtu mund të mbështesë zhvillimin e automjeteve autonome dhe robotëve të Tesla-s.
Ndërtimi i një fabrike çipash është një ndër projektet më komplekse dhe të kushtueshme në industri, mbi 20 miliardë dollarë dhe vite të tëra pune. Për këtë arsye, përfshirja e Intel është thelbësore, pasi SpaceX dhe Tesla nuk kanë përvojë në prodhimin e gjysmëpërçuesve. Intel, që dikur ishte lider në këtë sektor, po kërkon të forcojë pozicionin e saj duke gjetur partnerë të mëdhenj për biznesin e saj të prodhimit të çipave.
Në vitet e fundit, Intel ka humbur terren ndaj rivalëve si Nvidia dhe AMD, të cilët përdorin modelin “fabless”, duke projektuar çipa por duke ua besuar prodhimin kompanive të tjera. Ky bashkëpunim i ri mund të përfaqësojë një mundësi për rikthim në garë për Intel.
Pas lajmit, aksionet e Intel u rritën me mbi 3%, duke reflektuar optimizëm nga investitorët. Megjithatë, shumë detaje mbeten të panjohura dhe as Intel, as SpaceX nuk kanë dhënë komente të mëtejshme mbi projektin.
