Agjencia Franceze e Sigurisë së Informacionit ka publikuar një raport të ri mbi kërcënimet kibernetike, ku konfirmon se Apple ka dërguar një tjetër valë njoftimesh sigurie më 3 shtator 2025. Kjo është hera e katërt vetëm këtë vit që kompania paralajmëron përdoruesit për sulme të mundshme me spyware, pas valëve të mëparshme më 5 mars, 29 prill dhe 25 qershor.
Që prej vitit 2021, Apple ka zbatuar një praktikë të rregullt për të njoftuar individët që mund të jenë objektiv i sulmeve të sofistikuara me programe spiunazhi si Pegasus, Predator, Graphite apo Triangulation. Sipas autoriteteve franceze, këto sulme zakonisht synojnë persona me profile të larta publike ose profesionale, përfshirë gazetarë, avokatë, aktivistë, politikanë dhe zyrtarë të lartë. Marrja e një njoftimi nënkupton se të paktën një pajisje e lidhur me llogarinë iCloud të përdoruesit është vënë në shënjestër dhe mund të jetë komprometuar.
Raporti sqaron se paralajmërimet vijnë nëpërmjet iMessage nga adresa dhe kontakte të verifikuara të Apple. Përdoruesit që marrin njoftimin këshillohen të kontaktojnë menjëherë CERT-FR, të ruajnë emailin e Apple dhe të shmangin çdo ndryshim në pajisje – si fshirje aplikacionesh, përditësime apo rindezje – pasi këto mund të pengojnë hetimet.
Përveç këtyre udhëzimeve, agjencia rikujton masat bazë të sigurisë kibernetike, si shmangia e links të dyshimta, përdorimi i fjalëkalimeve të forta e unike dhe aktivizimi i verifikimit me dy hapa (2FA).
Deri tani nuk ka informacion mbi autorët e fushatës së fundit apo mbi personat konkretë që janë synuar, përfshirë nëse ka viktima jashtë Francës. Megjithatë, raporti thekson se kërcënime të tilla vazhdojnë të mbeten një rrezik i madh global për figurat publike dhe profesionistët që punojnë në sektorë strategjikë.
