Në ditë të tilla ndoshta transporti ajror mund të mos jetë shqetësimi kryesor, por ndikimi që bllokime të tilla kanë në shumë fusha të jetës është i madh. Qoftë ekonomik, emocional apo thjesht turistik, mundësia për tu lidhur me pjesë të ndryshme të botës është esenciale.
Koncepti për të cilin do të flasim ngelet për tu zbatuar kur situata të jetë normalizuar pasi bota po bëhet gati të risjellë fluturimet supersonike komerciale.
Boom Supersonic ka deklaruar se do të sjellë XB-1 një prototip të avionit supersonik komercial Overture i cili pritet të vijë në 7 Tetor dhe fluturimet testuese do të fillojnë në 2021.
Fluturimet pritet të jenë të paktën dyfishi i shpejtësisë maksimale të përdorur në ditët e sotme. Nga Londra në New York për vetëm 3 orë e 15 minuta.
Qëllimi i Boom Supersonic është të vërtetojë se e ardhmja e kësaj lloj teknologjie ëshë plotësisht e qëndrueshme si nga ana ekonomike ashtu edhe ajo mjedisore.
Përpara pandemisë Boom ka grumbulluar të paktën $6 bilion në porosi për avionë, ku secili kushton $200 milion, me klientë si Virgina Group dhe Japan Airlines.
Kjo nuk është hera e parë që fluturimet supersonike i ofrohen publikut, pasi në vitet 70 fluturimet Concord ishin shumë të famshme. Por në 2003 u regjistrua edhe fluturimi i fundit, iniciativa dështoi për shkak të keqmenaxhimit dhe zonave të banuara, pasi shpërthimet superonike mund të shkaktojnë shqetësime konstante akustike por edhe dëme si thyerje xhamash etj.
Nëse gjithçka shkon sipas planit, Overture i cili do të mbajë nga 55 deri në 75 pasagjerë do të fillojë fluturimet me pasagjerë në 2030. Do të përqëndrohet në 500 linja transoqeanike.
Do të jetë i pajisur me teknologji për uljen e zhurmës dhe do të fluturojë me shpejtësi supersonike vetëm mbi oqean.
