Elon Musk mendon se mund ta dërgojë raketën e tij Starship në Mars brenda vetëm dy vitesh. Në X, themeluesi i SpaceX ka thënë se misionet pa ekuipazh në Mars në vitin 2026 do të “testojnë besueshmërinë e uljes së komanduar” në planetin e kuq.
Dy vjet pas kësaj në vitin 2028, Starship do të dërgojë njerëz në Mars – kjo do të ishte hera e parë që njerëzit ulen në një planet tjetër. Starship – raketa më e madhe dhe më e fuqishme e ndërtuar ndonjëherë – ka realizuar teste të ndryshme gjatë viteve të fundit.
Janë kryer katër misione testimi deri më sot – në prill dhe nëntor të 2023 dhe mars dhe qershor të këtij viti. Automjeti gjigant ka performuar më mirë në çdo fluturim të njëpasnjëshëm, duke arritur të gjitha objektivat e tij kryesore në misionin më të fundit. SpaceX aktualisht është duke u përgatitur për fluturimin e pestë të Starship, i cili mund të ndodhë shumë shpejt. Fluturimi i pestë do të shfaqë disa veprime të reja dhe dramatike – përpjekja e parë për të ulur Super Heavy përsëri në vendin e nisjes.
Musk shtoi gjithashtu: “Shkalla e fluturimeve do të rritet në mënyrë eksponenciale nga atje, me qëllimin për të ndërtuar një qytet të vetë-qëndrueshëm në rreth 20 vjet.” Në fund të fundit, Musk dëshiron t’i bëjë njerëzit një specie ‘multiplanetare’ – që do të thotë se ne jetojmë në disa planetë, jo vetëm në Tokë.
Megjithatë Musk njihet për parashikimet e tij jo shumë të sakta, pasi shpesh herë planet e parashikuara nga CEO nuk janë realizuar në kohë.
