Anglia ishte e para që aprovoi vaksinat kundër Covid19 duke i dhënë shpresë botës, e duket se është po Mbretëria e Bashkuar ajo që i kanoset botës me një valë të dytë rreziku. Masa të reja shtrënguese janë vënë në Skoci, Wales dhe Angli ndërsa të paktën 20 shtete kanë bllokuar totalisht fluturimet me UK.
Arsyeja është siç edhe mund të kesh dëgjuar një variant i ri i virusit, një mutacion i cili paraqet rrezik të lartë për sistemet shëndetësore spitalore. Sepse së pari po zëvendëson format e vjetra të virusit, ka një shkallë infektimi shumë më të shpejtë dhe disa teste tregojnë se edhe dëmi është më i lartë.
Sa shpejt po përhapet?
U zbulua për herë të parë në shtator, në nëntor çereku i rasteve ishin mutacioni i ri dhe tani në dhjetor ka kapur 2/3 e rasteve të reja. Shifrat ende nuk janë më të saktat por pjesa më e madhe eksperimenteve tregojnë se ai është diku tek 70% më i shpejtë në trasnmetim.
Sa shumë është përhapur?
Kudo në UK, përveç Irlandës së Veriut, i përqëndruar më së shumti në Londër dhe veriun e Anglisë, por ka mjaft raste të pikasura në Hollandë, Danimarkë dhe Australi. Një variant i ngjashëm është kapur edhe në Afrikën e Jugut por duket se nuk ka lidhje me të.
Çfarë dimë për të?
Mutacionet kanë ndodhur edhe herë të tjera, virusi që po luftojmë sot në pjesën më të madhe të botës është goxha ndryshe nga ai që u shfaq fillimisht në Wuhan përpara një viti, janë të shumta variantet dhe mutacionet që ai ka kaluar, por ky i fundit është më agresiv, dhe antitrupat e krijuar në gjakun e atyre që e kanë kaluar nuk janë të aftë t’i bëjnë ballë.
A e bën kjo virusin më vdekjeprurës?
Deri tani nuk ka prova për këtë, por megjithatë duhet monitoruar, ama vetë fakti që përhapet më shpejtë është arsye e mjaftueshme për t’ia vështirësuar punën stafit mjeksor dhe spitaleve.
A do të funksionojë vaksina me këtë variant të ri?
Vaksinat e trajnojnë sistemin imunitar që të sulmojnë disa pjesë vitale të virusit, ndaj edhe nëse pjesë të gjembave të virusit kanë ndryshuar, vaksinat duhet të funksionojnë. Ekziston mundësia që virusi të bëhet totalisht ndryshe e t’i shpëtojë vaksinës, por për fat në këtë fazë që ndodhemi të treja vaksinat janë mjaft të modifikueshme, ndaj do të kthehet edhe kjo në gjendjen e gripit, me përditësime të vazhdueshme të formulës së vaksinës.
