Gjatë kësaj jave në CES 2023, AMD prezantoi disa proçesorë të rinj për notebooks dhe kompjutera desktop, ku ra shumë në sy seria AMD Ryzen 7040 e proçesorëve për laptopët super të hollë që do të sfidojnë M1 Pro dhe M2 të Apple.
Seria AMD Ryzen 7040 përbëhet nga proçesorët “super të hollë” të krijuar nëpërmjet proçesit 4nm, ndërkohë që proçesori më i fuqishëm është Ryzen 9 7940HS, i cili ka 8 cores, 16 threads dhe shpejtësi deri në 5.2GHz.
Gjatë prezantimit të këtij proçesori, CEO Lisa Su bëri disa deklarata tepër të guximshme duke treguar se Ryzen 9 7940HS është 30% më i shpejtë se proçesori M1 Pro i Apple. Një tjetër pikë e fuqishme e M1 Pro është dhe efiçienca e energjisë, por AMD tregon se proçesori i ri i kompanisë është shumë efiçient dhe mund të ofrojë luajte videosh për më tepër se 30 orë.
Gjithashtu në serinë Ryzen 7040 është i ndërtuar Ryzen AI, një motor i dedikuar AI që plotëson kërkesat e AI 20% më shpejt se proçesorët M2 të Apple, ndërkohë që janë 50% më efiçientë me energjinë.
AMD tregoi se testimet krahasuese ishin bërë duke përdorur një MacBook Pro me proçesorin M1 Pro, 32GM RAM dhe 1TB internal storage. Megjithatë në skenë nuk u përmend asnjë krahasim me proçesorin më të fuqishëm të Apple, M1 Max.
Seria Ryzen 7040 do të vijë në treg në muajin mars të këtij viti.
