Vetëm pak ditë pasi u prezantua nga Cupertino, laptopi më i ri i Apple ka nisur të shkaktojë debate në të gjithë industrinë e PC-ve. Lëvizja vjen në një moment veçanërisht të ndërlikuar, pasi prodhuesit përballen tashmë me presione serioze në zinxhirët e furnizimit, sidomos për memorien dhe komponentë të tjerë kyç.
Apple lançoi javën e kaluar MacBook Neo, duke e pozicionuar si laptopin më të lirë që kompania ka ndërtuar ndonjëherë. Me çmim fillestar $600 (ose 500 dollarë për studentët), pajisja synon përdoruesit që kërkojnë një kompjuter të lehtë dhe praktik për përdorim të përditshëm. Ky çmim, jashtëzakonisht i ulët për standardet e Apple, po shihet si një kërcënim serioz për ekosistemin më të gjerë të PC-ve Windows.
Sipas komenteve të fundit të bashkëdrejtorit ekzekutiv të Asus, S.Y. Hsu, prodhuesit kryesorë të PC-ve po diskutojnë tashmë mënyrat se si do të reagojnë. Gjatë thirrjes së fundit me investitorët, Hsu e cilësoi çmimin agresiv të MacBook Neo si një “tronditje” për prodhuesit OEM të Windows. Ai theksoi se jo vetëm prodhuesit e laptopëve, por edhe furnitorët e procesorëve dhe Microsoft po e marrin seriozisht këtë zhvillim.
Strategjia e Apple mund të rezultojë afatgjatë: nëse studentët dhe përdoruesit e zakonshëm hyjnë në ekosistemin e saj përmes këtij modeli të lirë, ata mund të vazhdojnë më pas drejt pajisjeve më të shtrenjta. Megjithëse laptopi ka kufizime, si 8GB memorie të pandryshueshme, krahasimet e para tregojnë se ai shpesh është më i shpejtë se shumë laptopë Windows në të njëjtin segment çmimi.
Në të njëjtën kohë, industria e PC-ve përballet me rritje të fortë të çmimeve të memories, që mund të çojë në shtrenjtim deri në 40% të laptopëve. Sipas Hsu, ndikimi real i Apple do të shihet me kalimin e kohës, por konkurrenca pritet të ashpërsohet ndjeshëm.
