Kompanitë që po merren me zhvillimin e teknologjive AI, si përshembull ChatGPT, duhet që të tregojnë qartësisht të gjitha materialet me të drejtat e autorit që kanë përdorur për të zhvilluar sistemet e tyre. Ky është rregulli më i ri i vendosur nga Bashkimi Evropian, i pari në kategorinë e tij që do të hapë rrugën për krijimin e ligjeve të tjera për të rregulluar përdorimin e kësaj teknologjie.
Komisioni Evropian nisi hartimin e “AI Act” 2 vite më parë për të rregulluar përdorimin e inteligjencës artificiale, e cila është rritur shumë falë investimeve gjigande dhe prezantimit të ChatGPT nga OpenAI.
Nën rregullat e reja, mjetet AI do të klasifikohen në bazë të nivelit të parashikuar të rrezikut, nga më minimalja e deri në atë me rrezik më të lartë dhe të papranueshëm. Shqetësimi kryesor mund të përfshijë mbikëqyrjen biometrike, shpërndarjen e informacioneve jo të sakta dhe përdorimi i gjuhës diskriminuese.
Dhe pse këto shërbime të klasifikuara si me rrezik të lartë nuk do të ndalohen, përdoruesit duhet të jenë shumë transparent në veprimet që kryejnë në këto shërbime. Kompanitë që ofrojnë teknologjinë AI për gjenerimin e imazheve, si Midjourney, do të duhet të shfaqin qartësisht të gjitha burimet e përdorura për të gjeneruar imazhin e ri.