Që nga prezantimi i gjeneratës së parë në vitin 2016, AirPods janë përmirësuar vazhdimisht me shërbime të reja, megjithatë funksioni kryesor i tyre nuk ka ndryshuar aspak: ato kanë nevojë të kontrollohen nga një smartphone. Mirëpo aplikimi i ri për patentim nga Apple na bën të dyshojmë se kjo gjë do të ndryshojë së shpejti.
Siç u vu re nga Patently Apple, US Patent & Trademark Office ka regjistruar aplikimin e Apple për një kasë të ridizenjuar të AirPods. Në pjesën e parme të kufjeve wireless do të integrohet një ekran, nëpërmjet të cilit përdoruesit do të kontrollojnë volumin apo këngët që luajnë, si dhe të aksesojnë aplikacione bazike si Maps, Weather apo njoftimet duke përdorur komandat zanore të Siri.
Apple kishte aplikuar për patentimin e kësaj teknologjie që në shtator të vitit 2022, gjë që tregon se kompania mund të ketë nisur testimin e kësaj ideje. Sigurisht Apple aplikon për patentimin e shumë teknologjive të reja, dhe mbetet për t’u parë nëse ekrani në kasën e AirPods do të shndërrohet në realitet.
Ekziston mundësia që kompania të aplikojë këto teknologji si një opsion për të gjithë përdoruesit e iPhone që nuk kanë një Apple Watch, për të kontrolluar median apo aplikacione bazike pa ndezur smartphone-in.
Për fat të keq nuk ka asnjë raportim që tregon se Apple ka nisur të aplikojë momentalisht këtë ndryshim.
