Anthropic ka hedhur një hap të rëndësishëm drejt publikut të gjerë duke prezantuar për herë të parë versionin publik të modelit të saj më të fuqishëm të inteligjencës artificiale, por me masa të forta sigurie. Të martën, kompania lançoi Claude Fable 5, versionin e parë publik të modelit Mythos, duke synuar të balancojë performancën e avancuar me një kontroll të rreptë të rreziqeve.
Sipas Anthropic, Fable 5 shkëlqen në inxhinieri softuerike, punë njohurish dhe përpunim vizual. Megjithatë, në fusha me rrezik të lartë si siguria kibernetike, biologjia, kimia dhe distilimi, modeli bllokon përgjigjet dhe kthehet automatikisht te Claude Opus 4.8, një version më pak i fuqishëm por më i sigurt.
Mythos ishte prezantuar fillimisht në prill si preview dhe ishte i kufizuar për një numër të vogël partnerësh, për shkak të shqetësimeve të sigurisë. Tani, një pjesë e kësaj teknologjie bëhet e disponueshme për të gjithë përmes Claude API dhe planeve Enterprise. Deri më 22 qershor, Fable 5 do të përfshihet pa kosto shtesë në abonimet Pro, Max dhe Team, përpara se të kalojë në model të veçantë.
Lançimi vjen në një moment delikat, teksa Anthropic përgatitet për tregjet publike, në të njëjtën garë me emra si OpenAI dhe SpaceX. Kompania ka paralajmëruar më herët se zhvillimi i shpejtë i AI mund të çojë drejt përmirësimit autonom të vetë sistemeve, pa ndërhyrje njerëzore.
Për të shmangur abuzimet, Anthropic ka testuar gjerësisht Fable 5 ndaj “jailbreak”-eve dhe ka vendosur një politikë të re, ruajtjen 30-ditore të të gjithë trafikut, edhe për klientët enterprise, vetëm për qëllime sigurie. Në testime të pavarura, kompani si Hex, Base44 dhe Genspark raportojnë performancë mbresëlënëse, sidomos në detyra komplekse dhe krijim aplikacionesh.
Me një çmim dyfish më të lartë se Opus 4.8, Fable 5 nuk synon përdorim masiv, por për disa kompani, si Rakuten, potenciali për operacione më autonome justifikon plotësisht koston.
