Jo vetëm Google po nxiton të nxjerrë në treg teknologjinë AI që do të rivalizojë fenomenin ChatGPT. Me sa duket dhe Alibaba ka si qëllim të krijojë një chatbot të ri të fuqizuar nga inteligjenca artificiale.
Kjo gjë u bë e ditur pasi kompania e konfirmoi një lajm të tillë me CNBC. Për momentin nuk ka shumë detaje mbi datën e prezantimit të këtij chatbot apo shërbimeve të veçanta që mund të përfshihen në të, megjithatë Alibaba ka treguar se ka nisur zhvillimin e kësaj teknologjie që në vitin 2017 dhe momentalisht është në fazën e testimit të saj.
Para pak ditësh, Google prezantoi chatbot-in e ri Bard, i cili është gjithashtu ende në fazë testimi. Falë investimit në OpenAI, Microsoft ka arritur të integrojë teknologjinë e ChatGPT në motorin e tij të kërkimit Bing, duke tërhequr vëmendjen e shumë përdoruesve.
Alibaba nuk ka treguar se në cilat segmente do të përdorë fuqinë e madhe të inteligjencës artificiale, megjithatë duke patur parasysh se kompania është e përfshirë në shumë biznese të ndryshme, do të jetë mjaft i lehtë implementimi i kësaj teknologjie.
Një tjetër kompani kineze, Baidu është në fazën e testimit të teknologjisë AI të quajtur “Ernie Bot”.
