Inteligjenca artificiale ka luajtur një rol gjithnjë e më të madh në jetën intime gjatë vitit 2025 dhe pritet të ndikojë edhe më shumë në vitin 2026, sipas parashikimeve të Lovehoney, një nga shitësit më të mëdhenj të produkteve të mirëqenies seksuale në Mbretërinë e Bashkuar. Raporti “TwentyTwentySex” tregon se 25% e Gen Z dhe 26% e brezit milenial kanë folur tashmë me AI për çështje që lidhen me seksin.
Sipas anketës me 2,022 persona, më shumë njerëz po i drejtohen AI-së për këshilla (52%) sesa miqve (32%) apo partnerëve të tyre (22%). Kjo ka bërë që AI të trajtohet gjithnjë e më shumë si një lloj “terapisti seksual”. Të dhënat tregojnë gjithashtu se meshkujt e rinj janë më të prirur ta përdorin AI për këshilla intime: 30% e meshkujve Gen Z dhe 34% e meshkujve milenial kanë diskutuar seksin me inteligjencën artificiale. Megjithatë, ekspertët paralajmërojnë se përdorimi i AI si terapist mund të jetë i rrezikshëm dhe të ofrojë këshilla të dëmshme.
Lovehoney parashikon se viti 2026 do të shënojë një ndryshim të madh në mënyrën se si njerëzit kërkojnë udhëzim, vërtetim dhe lidhje emocionale. Ndërkohë, po vërehet edhe një lëvizje në drejtim të kundërt: largim nga takimet digjitale dhe kthim te lidhjet reale. Me lodhjen nga aplikacionet e takimeve në rritje, gjithnjë e më shumë beqarë po marrin pjesë në evente offline, takime në kafene apo aktivitete sportive.
Sipas raportit, vetëm 30% e Gen Z dhe 35% e milenial kanë njohur partnerë romantikë apo seksualë përmes aplikacioneve, një shenjë e qartë e rënies së tyre.
