Një nga problemet e ndalimit të përhapjes të një virusi ngelet gjurmimi i rrugës që ka përshkruar ai. Pra kush ka pasur kontakt me kë. Sipas rregullores kjo çështje zgjidhet duke e pyetur të sëmurin dhe efikasiteti i metodës varet nga sinqeriteti dhe memoria e pacientit, mendja njerëzore sigurisht nuk ka sesi të jetë 100% e saktë, aq më pak kur ky virus sulmon tipikisht moshën e tretë.
Ai që nuk gabon kurrësesi në të tilla detaje është sigurisht smartphoni yt. Ndaj pikërisht këtu i ka ngulur sytë i gjithë Bashkimi Evropian.
Kina aktualisht po e merr veten nga kriza e Covid-19 pikërisht sepse ka akses të pa limituar tek të dhënat e smartphonëve të popullit të saj në çdo kohë. Ama në botën demokratike kjo është një shkelje e rëndë privatësie, sipas kartës të së drejtave të njeriut.
Vende si Anglia, Gjermani apo Italia mesa duket janë të gatshme ta lënë mënjanë demokracinë përkohësisht në përpjekje për të shpëtuar sa më shumë jetë të jetë e mundur. Në qeveritë respektive po shqyrtohet mundësia për të ndërhyrë tek të dhënat e shtetasve, më konkretisht tek regjistri i lokacioneve që smartphone yt regjistron, të cilat janë absolutisht të tuat dhe vetëm të tuat.
Këto të dhëna në ditë normale, shfrytëzohen nga Facebook, Instagram, Google etj për të bërë një eksperiencë reklamimi produktesh sa më efikase, të cilat nëse përdoren pa autorizimin e individit përbën shkelje të rëndë ligjore për të cilat vetë kompanitë e sipër përmendura kanë marrë edhe sanksione goxha të majme në disa raste.
Nëse këto data bien në duart e gabuara mund të shkaktojnë pafund dëme.
Mbetet një debat goxha aktiv. Evropa në themel të saj ka demokracinë, po sa vlerë ka kjo demokraci në kushte të tilla?
Një zgjidhje vërtetë efikase e cila mban një balancë të shëndetshme mes privatësisë dhe krizës globale ka prezantuar qeveria e Singaporit (më shumë këtu)
