Shkencëtarët kanë zbuluar një molekulë të re që duket se ngadalëson plakjen duke mbrojtur aktivitetin e mitokondrisë në qeliza.
Një ekip i Institutit Buck në Kaliforni identifikoi një përbërje në bimë që nxit punën e “qendrës së riciklimit” të një qelize, e cila dobësohet me kalimin e moshës. Ekipi testoi përbërjen bioaktive me veti antioksiduese dhe anti-inflamatore në krimbat e vegjël, duke zbuluar se jeta e tyre zgjatet me mesatarisht 20 ditë, me disa që jetojnë më shumë se 30 ditë. Ky përbërës, i gjetur gjithashtu në kanellë, arriti suksesin e tij te krimbat duke vepruar në një receptor që është i pranishëm dhe tek njerëzit, duke sugjeruar që këto rezultate mund të aplikohen edhe për njerëzit.
Studimi, i botuar në Nature Aging, zbuloi se jetëgjatësia u rrit për shkak se funksioni i mitokondrisë së krimbave u përmirësua përmes fuqive të përbërësit të quajtur coumarin. Mitokondritë janë burimi energjitik i qelizave, të cilat sigurojnë energjinë e duhur për kryerjen e funksioneve të nevojshme. Kur ato nuk funksionojnë siç duhet, nis shfaqja e problemeve tek njerëzit.
Normalisht, qelizat kanë një proces të riciklimit të mbetjeve në qelizë, por me rritjen e moshës ky proces ngadalësohet duke çuar në një grumbullim të madh me mbetje brenda në qelizë. Coumarin është pikërisht përbërja e nevojshme që ka aftësitë për të nxitur procesin e riciklimit të mbetjeve brenda në qelizë, duke parandaluar kështu plakjen.
Pas testimeve tek krimbat dhe në qelizat muskulore të minjve, shkencëtarët panë se këto përbërje nxitën mjaft mirë procesin e riciklimit të mbetjeve, dhe ky rezultat bëri shkencëtarët të besojnë se efekte të tilla do të ndodhin dhe në trupin e njeriut.
