Një teori e re në fizikë sugjeron se universi mund të ketë 7 dimensione, jo vetëm katër që ne përjetojmë (gjatësia, gjerësia, thellësia dhe koha). Sipas kësaj ideje, ekzistojnë edhe tre dimensione shtesë, të padukshme për ne humanët. Edhe pse tingëllon si diçka nga The Matrix, kjo teori synon të zgjidhë një nga problemet më të mëdha në fizikë: paradoksin e informacionit në vrimat e zeza.
Në vitet 1970, Stephen Hawking tregoi se vrimat e zeza nuk janë plotësisht “të zeza”, por lëshojnë rrezatim dhe avullohen me kalimin e kohës. Ky është një problem, sepse sipas ligjeve të fizikës kuantike, informacioni nuk mund të zhduket kurrë. Nëse një vrimë e zezë zhduket plotësisht, atëherë çfarë ndodh me informacionin që ajo përmbante?
Studiues si Richard Pinčák propozojnë një zgjidhje: në një univers me 7 dimensione, hapësira-koha jo vetëm përkulet, por edhe torsionohet. Kur një vrimë e zezë avullohet, këto dimensione shtesë krijojnë një “nyje” shumë të vogël që ndalon zhdukjen totale të saj. Në vend që të zhduket, vrima e zezë lë pas një mbetje jashtëzakonisht të vogël që ruan të gjithë informacionin brenda saj.
Kjo do të thotë se informacioni nuk humbet kurrë, duke zgjidhur paradoksin. Për më tepër, teoria mund të shpjegojë edhe fenomene të tjera, si mekanizmi i Higgs-it që u jep masë grimcave, dhe madje natyrën e materies së errët, e cila përbën rreth 27% të universit.
Megjithatë, kjo mbetet një hipotezë teorike. Grimcat që do të provonin ekzistencën e dimensioneve shtesë janë shumë më të rënda se ato që mund të zbulojmë aktualisht me pajisje si Large Hadron Collider. Shpresohet që në të ardhmen, prova indirekte mund të gjenden në rrezatimin kozmik ose valët gravitacionale.
