Një studim i ri ka zbuluar se rrotullimi i bërthamës së Tokës është ngadalësuar aq shumë sa ka ndërruar drejtim në fakt. Ndërsa ka ende shumë gjëra rreth planetit tonë që nuk shpjegohen ende, ajo që ne dimë është se planeti ynë përbëhet nga shtresa të ndryshme: korja, manteli dhe bërthama.
Tani një studim i ri ka sugjeruar se shpejtësia e bërthamës së Tokës është ngadalësuar në mënyrë dramatike dhe po rrotullohet në mënyrë të pavarur nga planeti ynë në drejtim të kundërt.
Bërthama është pjesa më e nxehtë e planetit me një nivel nxehtësie të barabartë me atë të sipërfaqes së Diellit. Por, në 5,180 kilometra poshtë brenda Tokës, bërthama e ngurtë kryesisht prej hekuri dhe nikelit, po rrotullohet në drejtim të kundërt.
Që kur sizmologia daneze Inge Lehmann bëri zbulimin për bërthamën e brendshme të Tokës në vitin 1936, ekspertët kanë vazhduar të studiojnë sjelljen e saj dhe të debatojnë shpejtësinë dhe rrotullimin e saj. Tani, duket se një teori e paraqitur në vitin 2023 është vërtetuar e saktë pasi një studim i fundit i botuar në revistën Nature përdori të dhëna nga sizmogramet e mbledhura gjatë tërmeteve dhe shpërthimeve, të cilat sugjerojnë se thelbi i planetit ka qenë duke u ngadalësuar në krahasim me sipërfaqen e Tokës.
Bashkautori i studimit, Dr. John Vidale, profesor në Universitetin e Kalifornisë Jugore, citohet të ketë thënë: “Mendoj se i kemi dhënë fund debatit 20 vjeçar nëse bërthama lëviz dhe cili ka qenë modeli i tij i lëvizjes për dy dekadat e fundit.”
Megjithëse ndikimi i drejtpërdrejtë i rrotullimit të bërthamës në fushën magnetike është i panjohur, shkencëtarët kishin raportuar më parë në vitin 2023 se një bërthamë me rrotullim më të ngadaltë mund të ndikojë potencialisht në të dhe gjithashtu të shkurtojë pjesërisht gjatësinë e një dite me të mijtat e sekondës. A do të ndikojë kjo në jetën tonë si njerëz? Nuk ka gjasa.
