CEO i Apple, Tim Cook sapo tregoi se nuk ka në plan që në të ardhmen iPhone të implementojë teknologjinë RCS të komunikimit përmes mesazheve, për t’i dhënë kështu fund mesazheve me flluska jeshile që vijnë nga përdoruesit e Android.
“Unë nuk dëgjoj nga përdoruesit tanë të kërkojnë që ne të shpenzojmë më tepër energji në këtë drejtim.” Iu përgjigj Tim Cook pyetjes së gazetarit LiQuan Hunt.
Hunt më pas i tregoi atij një rast konkret ankese, ku tha se mamaja e tij që përdor një smartphone Android nuk mund të shikojë dot videot që ai i dërgon. Përgjigja e Tim Cook ishte shumë e thjeshtë – “Bleji mamasë një iPhone.”
Dhe pse ndarja e mesazheve që vijnë nga sisteme të ndryshme operative me flluska blu dhe jeshile mund të duket një gjë e parëndësishme, për shumë përdorues të iPhone-ve është e rëndësishme.
Pak kohë më parë Google ndërmorri një fushatë sensibilizuese ku kërkonte nga Apple që të aplikonte sistemin RCS të mesazheve, pasi qartësisht ky sistem është shumë më i avancuar dhe zhduk diferencën mes mesazheve të dërguara nga iOS dhe Android.
