Në ditën e parë zyrtare të CES 2026, vëmendja e botës së teknologjisë është përqendruar te një valë thashethemesh që sugjerojnë se Apple mund të jetë më në fund pranë prezantimit të pajisjeve të palosshme në linjën e iPhone. Shkak për këto spekulime është bërë një prototip i ri ekrani OLED i palosshëm nga Samsung Display, i ekspozuar në panair, i cili thuhet se hapet plotësisht duke u shndërruar në një ekran të madh, të ngjashëm me tabletin, pa rrudha të dukshme në mes.
Sipas mediave të pranishme në CES, paneli i quajtur “Advanced Crease-less OLED” u demonstrua krah për krah me Galaxy Z Fold 7 aktual dhe përfaqësonte një përmirësim të qartë, veçanërisht për sa i përket eliminimit të vijës së palosjes, një nga problemet kryesore të pajisjeve foldable deri më sot. Ky prototip besohet se do të shërbejë si bazë për modelet e ardhshme të Samsung, si Galaxy Z Fold 8 dhe Wide Fold.
Fakti që Samsung Display është një nga partnerët kryesorë harduerikë të Apple ka shtuar spekulimet se kjo teknologji mund të jetë themeli i ekranit “pa rrudha” që Apple ka kërkuar prej vitesh. Pikërisht mungesa e një zgjidhjeje të tillë besohet se ka vonuar hyrjen e Apple në tregun e pajisjeve të palosshme. Sipas pritshmërive, kompania mund të prezantojë një pajisje të tillë më vonë gjatë këtij viti.
Ndërkohë i ekspozuar në të njejtën hapësirë ishte dhe Galaxy Z TriFold, pajisja më e re e palosshme e Samsung, e prezantuar vetëm një muaj më parë. Edhe kompani të tjera, si Motorola, pritet të hyjnë në këtë garë me një pajisje foldable në stil libri, të përfolur si Motorola Razr Fold me fokus te inteligjenca artificiale.
Megjithatë, realiteti i një ekrani plotësisht pa rrudha ende nuk është i garantuar. Sipas Samsung, paneli i ekspozuar ishte vetëm një koncept kërkimor (R&D), pa afat apo plan konkret për komercializim, dhe pas raportimeve fillestare, prototipi u hoq nga stenda e kompanisë.
