Seria Samsung Galaxy S26 është projekti i radhës madhor i kompanisë koreane, dhe rrjedhjet e fundit kanë zbuluar pothuajse çdo detaj të mundshëm. Modelet S26, S26+ dhe S26 Ultra pritet të vijnë me përmirësime të ndjeshme në kamera dhe funksione të inteligjencës artificiale, ndërsa raportohet se prezantimi i tyre mund të shtyhet deri në fund të shkurtit 2026, shoqëruar edhe me një rritje të mundshme çmimi.
Ndërkohë, vëmendja ka filluar të zhvendoset drejt Galaxy S27, i cili pritet në fillim të vitit 2027. Edhe pse është ende herët për detaje të sakta, një rrjedhje e re nga një përdorues në platformën X ka zbuluar referenca për një sistem të ri të identifikimit të fytyrës në modelin Galaxy S27 Ultra, të quajtur Polar ID v1.0. Ky sistem, sipas raportit, përdor dritë të polarizuar për identifikimin biometrik dhe ofron një rezistencë shumë më të madhe ndaj mashtrimeve krahasuar me teknologjitë aktuale të njohjes së fytyrës në Android. Për më tepër, reagimi i sistemit përllogaritet të ketë një vonesë vetëm 180 milisekonda.
Teknologjia e re besohet të jetë rezultat i bashkëpunimit të Samsung dhe Qualcomm me kompaninë amerikane Metalenz, e cila po zhvillon alternativa të avancuara për t’i rivalizuar sistemin Face ID të Apple. Nëse implementohet me sukses, kjo do të përfaqësonte një hap të madh përpara në sigurinë dhe shpejtësinë e identifikimit në pajisjet Android.
Megjithatë, ekspertët theksojnë se ende është shumë herët për konfirmime, pasi deri në lançimin e Galaxy S27 mund të ndodhin ndryshime të shumta teknologjike. Deri atëherë, vëmendja mbetet tek Galaxy S26, që do të rikthejë çipin Exynos 2600, një sistem kamerash të përmirësuar dhe veçori të reja AI, ndërsa mund të shohim edhe rikthimin e modelit S26 Edge.
