OnePlus ka konfirmuar zyrtarisht lançimin e një serie të re smartphone-sh të quajtur OnePlus Turbo, pas një periudhe plot thashetheme rreth kësaj serie. Konfirmimi erdhi nga Presidenti i kompanisë, Louis Lee, i cili përmes një postimi në rrjetin social kinez Weibo dha edhe disa detaje mbi drejtimin dhe filozofinë e kësaj linje të re produktesh.
Sipas Lee, seria OnePlus Turbo do të fokusohet kryesisht te performanca, duke synuar përdoruesit që kërkojnë fuqi të lartë për përdorim intensiv, veçanërisht për lojëra. Një prioritet i veçantë do t’i kushtohet gjithashtu jetëgjatësisë së baterisë, brenda segmentit të çmimit ku do të pozicionohet kjo seri. Edhe pse OnePlus nuk ka zbuluar ende shifrën e saktë të çmimeve, pritet që Turbo të jetë një seri e mesme (mid-range), e konceptuar për të konkurruar drejtpërdrejt me linjën Redmi Turbo.
Sipas informacioneve të publikuara nga burimi i njohur Smart Pikachu, dy pajisje nga seria Turbo pritet të prezantohen në janar 2026. Të dy modelet thuhet se do të kenë ekrane të mëdhenj dhe bateri shumë të fuqishme, rreth 9,000 mAh, çka do të përfaqësonte një rekord të ri për OnePlus. Për krahasim, OnePlus Ace 6T, i lançuar së fundmi, mban aktualisht baterinë më të madhe të kompanisë me 8,300 mAh.
Një rrjedhje e mëparshme sugjeron gjithashtu se një nga modelet OnePlus Turbo mund të përdorë një version të modifikuar të procesorit Snapdragon 8s Gen 4, duke e forcuar edhe më tej fokusin në performancë dhe gaming. Kjo do ta bënte serinë veçanërisht tërheqëse për përdoruesit që kërkojnë specifika të avancuara me një çmim më të përballueshëm.
Aktualisht, seria OnePlus Turbo është konfirmuar vetëm për tregun kinez dhe nuk ka ende informacion zyrtar për një prezantim global.
