Dizajni i iPhone 15 Pro është zbuluar plotësisht pas shfaqjes në internet të modeleve CAD të përdorura për prodhimin e smartphone-ve. Këto modele zbulojnë se Apple po përgatitet për të bërë një ndryshim mjaft të madh në dizajnin e smartphone-ve që prodhon.
Të zbuluara për herë të parë nga 9to5Mac dhe të dizenjuara nga Ian Zelbo, këto modele tregojnë se iPhone 15 Pro do të përdorë për herë të parë portën e karikimit USB-C, do të jetë më i rrumbullakosur se pajisjet paraardhëse dhe do të ketë korniza më të holla.
Gjithashtu besohet se një tjetër ndryshim do të vijë në ishullin e pasëm të kamerave, pasi ajo do të jetë masive. Informacionet e reja zbulojnë se Apple po zhvillon disa sensorë akoma më të mëdhenj për serinë e ardshme të iPhone-ve si dhe do të përdorë 3 shtresa për të mbuluar kamerën në vend të 2 shtresave të përdorura në iPhone 14 Pro. Besohet se kamerat do të jenë rreth 50% më të trasha se ato në një iPhone 14 Pro.
Sigurisht përmirësimet janë gjithmonë të mirëpritura, mirëpo madhësia e ishullit të kamerave është rritur aq shumë saqë persona të ndryshëm do të irritohen nga ky ndryshim. Emrat e koduar për të gjitha pajisjet që janë pjesë e serisë iPhone 15 janë:
iPhone 15 – D37 – Spyder
iPhone 15 Plus – D38 – Shasta
iPhone 15 Pro – D83 – Vantage
iPhone 15 Pro Max – D84 – Veyron
