Huawei pritet të lançojë telefonin e parë në botë me palosje të dyfishtë në shtator në Kinë. Menjëherë pas këtij lajmërimi, Tecno ka prezantuar telefonin e saj novator që vjen gjithashtu me palosje të dyfishtë, Phantom Ultimate 2, në konferencën e teknologjisë IFA 2024 në Berlin, ku Geek Room do të jetë i pranishëm për t’ju informuar me të rejat më të fundit nga bota e teknologjisë.
Phantom Ultimate 2 spikat me profilin e tij të hollë, me përmasa vetëm 11 mm kur paloset, duke e bërë atë më të hollë se Galaxy Z Fold 6, i cili ka një trashësi prej 12.1 mm. Ai përmban një dizajn të ri menteshe dhe një cover baterie ultra të hollë, vetëm 0,25 mm të trashë, të krijuar nga materiali super i kompresuar Titan Advanced Fiber.
Kur mbyllet, telefoni ka një ekran 6,48 inç, por ai shpaloset në një panel të madh 3K OLED 10 inç me një raport pamjeje 4:3. Pajisja mbështet mënyra të shumta të palosjes, duke përfshirë një konfigurim të ngjashëm me laptopin, një modalitet shikimi të mediave dhe një modalitet tendë, ideale në rastin e përkthimit në kohë reale.
Menteshat janë testuar për qëndrueshmëri, të afta të përballojnë deri në 300,000 palosje. Tecno ka optimizuar softuerin e Phantom Ultimate 2 për të përmirësuar kryerjen e shumë detyrave në tre dritare vertikale dhe për të ofruar sfonde të përshtatshme për skenarë të ndryshëm të palosjes.
Së fundmi, pajisja është e pajisur me një ishull me 3 kamera në anën e pasme për fotografim. Siç mund të shihet në imazhin e fundit, trashësia minimale shfaqet plotësisht kur ekrani i tij është zgjeruar plotësisht.
Një telefon kocept është një pajisje eksperimentale që shfaq dizajne ose teknologji të përparuara që mund të mos jenë të disponueshme në produktet aktuale. Këta telefona përdoren shpesh për të demonstruar se çfarë është e mundur në të ardhmen, por ato zakonisht nuk janë të destinuara për lëshim komercial, duke e bërë të pamundur që ata të jenë të disponueshëm për blerje.
