Një YouTuber ka publikuar në platformë një video të re ku ai çmonton pajisjen më të re flagship nga Apple, iPhone 14 Pro Max, për të parë më nga afër ndryshimet e bëra. Megjithatë në këtë pajisje nuk kishte shumë surpriza.
Në këtë gjeneratë Apple vendosi që kartat SIM të hiqeshin nga të gjitha pajisjet që do të shiten në tregun amerikan, duke i zëvëndësuar ato me eSIM. Pikërisht këtu vjen dhe zhgënjimi më i madh, pasi fillimisht heqja e kartës SIM fizike mendohej se do të mundësonte një hapësirë më të madhe që mund të shfrytëzohej nga bateria e pajisjes.
Në videon e tij të çmontimit, PBKReviews tregoi se hapësira e siguruar nga heqja e kartës SIM nuk është shfrytëzuar aspak nga pajisjet e reja dhe është mbushur nga një copëz plastike. Në versionin origjinal të videos tregohej se kjo hapësirë mund të përdorej për modulin satelitor, mirëpo kjo gjë u mohua më pas nga krijuesi i videos.
Megjithatë një gjë e tillë mund të merret me mend nga përdoruesit e Apple, për sa kohë modelet për tregjet ndërkombëtare kanë ende një hapësirë reale për karta SIM.
