Seria e smartphone-ve Xiaomi 13 ka qenë në trend që nga lançimi në dhjetorin e vitit të kaluar e deri më tani me lançimin e Xiaomi 13 Ultra. Megjithatë dhe pse vetëm pak javë kanë kaluar nga këto lançime të bujshme kanë nisur të qarkullojnë në internet renders ku shfaqet dizajni mjaft elegant i smartphone-it që do të quhet Xiaomi 14 Pro.
Këto publikime janë bërë nga ITHome, kur një përdorues i rrjetit pyeti Wei Xu rreth këtij smartphone-i. Duhet që të theksojmë se Wei Xu është drejtuesi i dizajnit në departamentin e dizajnit industrial të kompanisë. Ai theksoi gjatë deklaratës së tij se proçesi i dizenjimit të Xiaomi 14 Pro ka përfunduar, dhe se do të jetë shumë më tërheqës se Mi 11 Ultra.
Në Mi 11 Ultra ne pamë një dizajn revolucionar me ekran në pjesën e pasme, të integruar në ishullin e kamerave. Ky ekran dytësor mund të përdoret për të shikuar informacione të shkurtra si parashikimi i motit, kontrollet e muzikës, njoftimet apo dhe një ndërfaqje të vogël të kameras.
Pjesa e pasme e këtij smartphone-i është prej qeramike, në mënyrë të ngjashme me Xiaomi 12 Pro. Këto smartphone janë të pajisur me produktet më të avancuara teknologjike, dhe padyshim lançimi i serisë Xiaomi 14 do të jetë mjaft i pritur.
