Apple po përgatitet të prezantojë disa ndryshime të rëndësishme në versionin më të ri të iOS që pritet të publikohet në fund të shtatorit. Kësaj here në versionin më të ri beta të iOS 16 është parë se kompania ka shtuar një shërbim të ri të shumëkërkuar nga përdoruesit, ikonën e përqindjes së baterisë.
Tashmë të gjithë përdoruesit do të mund të lexojnë përqindjen e saktë të baterisë së mbetur në pajisjen e tyre pa patur nevojën për të hapur panelin e njoftimeve. Ky ndryshim rikthehet në iOS 16 beta 5, megjithatë duhet të aktivizohet manualisht nga të gjithë personat që kanë instaluar versionin beta.
Opsioni për aktivizimin e këtij shërbimi gjendet në menunë Settings, duke klikuar në Battery. Nga aty do t’ju shfaqet opsioni Battery Percentage, të cilin duhet ta aktivizoni.
Treguesi i përqindjes së baterisë në iPhone për herë të parë u prezantua shumë më herët në iPhone 3GS para se të zhdukej me shpikjen e notch-it në iPhone X. Dihet gjërësisht se në Android një shërbim i tillë ka ekzistuar dhe nuk është zhdukur asnjëherë prej shumë vitesh.
Megjithatë na duhet ende të presim deri në prezantimin final të iOS 16 për të kuptuar nëse ky shërbim do të jetë i pranishëm, pasi shpesh herë ka qëlluar që Apple të mos përfshijë të gjitha ndryshimet e bëra në beta në versionin final të iOS.
