Apple pritet të prezantojë iPhone 17e në muajt në vijim, si pasardhës i iPhone 16e të prezantuar në shkurt 2025. Ky model synon të mbetet alternativa më e përballueshme në linjën e Apple, por me disa përmirësime të dukshme krahasuar me paraardhësin.
Në aspektin e dizajnit, iPhone 17e pritet të ruajë formën e njohur me ekran 6.1 inç, kamerë të vetme në pjesën e pasme dhe ngjyrë të bardhë ose të zezë. Ndryshimi më i përfolur është kalimi nga “notch” te Dynamic Island, çka do t’i jepte telefonit një pamje më moderne, edhe pse kjo nuk është ende e konfirmuar përfundimisht.
Ekrani pritet të mbetet i njëjtë me atë të iPhone 16e: OLED me rifreskim 60Hz, pa teknologjinë ProMotion 120Hz dhe pa “always-on display”. Megjithatë, ka zëra se Apple mund të zvogëlojë kornizat, duke rritur sipërfaqen e dukshme të ekranit.
Në zemër të pajisjes do të jetë çipi A19, i ndërtuar me procesin 3nm N3P, që sjell rritje performance prej 5–10% krahasuar me A18. Ka gjasa që Apple të përdorë një version paksa të kufizuar të këtij çipi, me GPU më të dobët. iPhone 17e pritet të ruajë 8GB RAM, ndryshe nga modelet më të shtrenjta që ofrojnë 12GB.
Një nga përmirësimet më të rëndësishme mund të jetë përputhshmëria me MagSafe, e munguar te iPhone 16e. Kjo do të sillte karikim më të shpejtë wireless dhe akses në ekosistemin e gjerë të aksesorëve MagSafe.
Sa i përket kamerës, nuk priten ndryshime madhore: një kamerë e pasme 48MP dhe një kamerë selfie 12MP. Për sa i përket lidhjes, iPhone 17e do të përdorë modemin e ri C1X, më i shpejtë dhe më efikas, por nuk do të përfshijë çipin e ri N1 për Wi-Fi dhe Bluetooth.
Çmimi pritet të mbetet $599, ndërsa prezantimi mund të ndodhë në shkurt 2026, pa një event të veçantë, përmes një njoftimi zyrtar nga Apple.
